1 Samuel 17

Narampunmi to Filistin tu mintu’ surodadunna la parari, nasirampun dio Sokho lan lili’na Yehuda, napabendanni tu tendana dio kasiallaranna Sokho na Azeka dio Efes-Damim.

Apa iatu Saul sia mintu’ to Israel sirampun duka anna pabendanni tu tendana lan lombok Tarpin, nasipa’pampangan to Filistin.

Bendanmi tu to Filistin dao tanete sambalinna lu na to Israel dao tanete indena mai, napetangngai tu lombok iato.

Ta’kala sunmi lan mai tuntunan surodadu to Filistin misa’ pa’barani, disanga Goliat dio mai tondok Gat; iatu langka’na annan siku sangdangkan.

Ma’songko’ tambaga sia ma’bayu kararran ma’sissik; iatu bayu kararranna limangsa’bu sikele’ tambaga timbanganna.

Sia den dukapa sambo bi’ti’ tambaga sia doke bandangan napassan dao palempengna.

Iatu pasoan dokena susi tandaan to ma’tannun sia iatu mata dokena annan ratu’ sikele’ bassi magasanna; sia den misa’ to ma’baa balulang dolo lumingka dio tingayona.

Iatu pa’barani iato bendan anna metamba-tamba lako tuntunan surodadu to Israel, nakua: Ma’apari mitassu’ ma’pampangan la parari? Tae’raka ku misa’ to Filistin te, na kamu sola nasang kaunanna Saul? Pileimokomi misa’ tau anna solo’ mai umpentammuina’.

Ianna belai kusirarian sia natalona’, la mipokaunan nasangkan, apa iangku sau’i sia kutaloi, la kipokaunan nasangkomi sia la mengkaolakomi lako kaleki.

Sia nakuapa tu to Filistin iato: Allo iate kuape tu mintu’ tuntunan surodadu to Israel: Pamaiammo’ misa’ muane angku situnggaran sirari.

Iatonna rangimi Saul sia mintu’ to Israel tu kadanna tinde to Filistin, tirambanmi sia lendu’ mataku’na.

Iatu Daud, iamo anakna misa’ to Efrata dio mai Betlehem lan lili’na Yehuda, disanga Isai, tu karua anakna muane; tonna linona Saul iamo misa’ to matua tu matessek tonganmo.

Iatu anakna Isai tallu tu kapuana malemo unturu’ Saul parari. Iato tallu anakna tu male parari, disanga Eliab tu pa’bunga’, ma’penduanna Abinadab na iatu ma’pentallunna Syama.

Iatu Daud iamo tampakna, apa iatu kakanna sola tallu male unturu’ Saul.

Iatu Daud sipissan-pissanri sule dio mai Saul male lako Betlehem ungkambi’i dombana ambe’na.

Melambi’ makaroen tassu’ lako tingayo ma’tenten tu to Filistin iato, susi bangmo napogau’ to lan patangpulo allona.

Ma’kadami tu Isai lako Daud, anakna, nakua: Alanni kakammu sangepa tu passara’buk sia roti sangpulo batunna, mumadomi’ umbaai lako kakammu lan to’ tenda surodadu.

Apa iate dangke sangpulo ira’na la muban pangulu to sangsa’bu ammu pekutananni ba’tu malaga’-laga’ siai tu kakammu, musule umbangki’ misa’ tanda, kumua tuo siapa.

Iatu Saul sola tau iato mai sia mintu’ to Israel diong lombok Tarpin marassan sirari to Filistin.

Melambi’ dio mai milikmi tu Daud natampeanni to mangkambi’ tu mintu’ domba, naalai tu apa iato mai, namale susitu napasan Isai lako kalena. Rampomi lako to’ tenda dikampai tonna tassu’ tu surodadu la ma’pampangan sia unnarrak-arrak la parari.

Napasipa’pampangammi to Israel sia to Filistin tu surodadunna.

Napatorromi Daud tu mintu’ apa nabaa, anna ma’dondo-dondo sae lako surodadu ma’pampangan; iatonna rampomo lako mekutanami lako kakanna diona kamalaga’-lagaranna.

Tonna marassanpa sipa’kada tau iato mai, ta’kala sunmi lan mai tuntunan surodadu to Filistin tu pa’barani disanga Goliat, misa’ to Filistin dio mai tondok Gat. Anna pokadai tu mintu’ kada iato, naurungan narangi Daud.

Iatonna tiromi mintu’ to Israel, mataku’ nasangmi nasorong boko’ dio mai tingayona.

Ma’kadami tu misa’ to Israel, nakua: Mitiroraka tu to male lako tingayo? Ia sia namale lako tingayo to la unnape to Israel! Minda-minda umpatei la naben datu kasugiran kapua sia la naben anakna napobaine sia mintu’ sangdadianna tang dipopassima sia tang dipopa’jama.

Ma’kadami tu Daud lako tu to nasikandappiran bendan, nakua: La dipatumbai tu to umpatei tu to Filistin iato dio, sia tu ussamboi siri’na to Israel? Na minda toda ia tu to Filistin tang disunna’i tu, anna unnape tuntunan surodadunNa Puang Matua matontongan?

Natolemi napokada tau lako tu mintu’ kada iato, nakua: Susimo la dipogau’ to lako tu to umpatei.

Narangimi Eliab, kaka pa’bunga’na, tu apa napokada lako tau iato, iamoto anna re’dek ara’na lako Daud, anna ma’kada nakua: Ma’apari ammu saera inde te sia mindara mupa’tampei tu domba sidi’ dio padang pangallaran? Kuissanmo tu kabaraniammu sia kakadakeanna penaammu; iatu kasaeammu te, la morairoko untiro kasirarian.

Mebalimi Daud nakua: Apara salaku, anna mekutana bangra’?

Mentingo lakomi to senga’; umpekutananni tu kada ina’. Nabalimi tu tau iato mai susitu kada dolo.

Lelemi tu kada napokada Daud, naparampoi tau lako Saul. Napesuammi Saul untambai.

Ma’kadami Daud lako Saul, nakua: Moi misa’ tau da naranggang penaanna belanna iatu to Filistin iato; na akumora, kaunanmi male sirari tu tau iato.

Ma’kadami Saul lako Daud, nakua: Tang mukulle la lao sirari tu to Filistin iato, belanna to mangurapoko na inang anak rari ia tempon dio mai bitti’na.

Apa ma’kada Daud lako Saul, nakua: Biasana’ ungkambi’ dombana ambe’ku; den sipissan-pissan nasae tu singa sia beruang undammakki misa’ tu domba iato.

Malemo’ unnula’i sia kulonga’ angku sintakki tu domba iato lan mai sadangna; iatonna la ullumpa’ina’, kula’ka’imi tu danggo’na angku ombangi sia kupatei.

Moi singa moi beruang kupatei duka. Na iatu to Filistin tang disunna’i iato la dipasusi misa’ tu olo’-olo’ iato, belanna naape tu tuntunan surodadunNa Puang Matua matontongan.

Sia nakuapa Daud: Iatu PUANG, tu urrampananna’ dio mai kanuku singa sia dio mai kanuku beruang, Ia duka la urrampananna’ dio mai limanna to Filistin iatu. Ma’kadami Saul lako Daud: Malemoko, na PUANGmora urrondongko.

Napapakeanmi Daud tu pakeanna Saul sia napasongko’i songko’ tambaga tu ulunna sia napapasangi bayu kararran.

Natakinmi Daud tu pa’dangna salianna bayu kararranna, anna tobai lumingka, belanna iatu susinnato, tae’ bangpa natobai. Attu iato nakuami Daud lako Saul: Tang kubela lumingka umpakei te, belanna tae’ bangpa kutobai. Nalendokammi Daud sule.

Natoemi tu tekken anna pilei tu lima batu malangngo’ diong mai salu, anna patamai kandu’ pangkambi’ nasaririi, lan sapa’ tu napanninna batu, anna toei tu lobang, anna pengkareke’i tu to Filistin iato.

Saemi tu to Filistin umpengkareke’i Daud sia iatu to umbanni balulangna dolomo dio tingayona.

Iatonna tiromi to Filistin langngan, napemarangami tu Daud, natunaimi, belanna piapa, mariri api beluakna sia melo pantarisanna.

Nakuami tu to Filistin lako Daud: Asura’kate, ammu saera unnea tekkenna’. Nagataimi tu Daud ussa’bu’ deatanna.

Nakuami tu to Filistin iato lako Daud: Maimoko, angku benni manuk-manuk dao lu langi’ sia mintu’ olo’-olo’ dio lu padang tu duku’mu.

Apa nakua Daud lako to Filistin iato: Iatu iko sae lako kaleku ma’pa’dang sia ma’doke sia ma’doke lambaran, apa aku te sae lako kalemu tete dio sanganNa PUANGna mintu’ ma’dandan maritik, iamotu Kapenombanna kaponan surodadu to Israel, tu muape-ape.

Allo ia dukamote Nasorongko PUANG tama limangku, angku pateiko sia kupoloi tu ulummu, sia allo ia dukate kubenni manuk-manuk dao lu langi’ sia mintu’ olo’-olo’ dio lu padang tu batang rabukna to Filistin, anna issanni mintu’ issinna lino, kumua dio bangsa Israel den tu Puang Matua.

Sia mintu’ kombongan iate la unnissanni tu diona PUANG umpaden kapataloan tae’ natete dio pa’dang sia doke, sangadinna iatu rari PUANG umpoissanni sia Ia duka la ussorongkomi tama limangki.

Iatonna lumpa’i to Filistin iato tu Daud, ma’dondomi tu Daud lako to’ surodadu ma’pampangan, umpessitammui tu to Filistin iato.

Nakokomi Daud tu kandu’na, naalai tu batu misa’ lan mai, anna pa’lobanganni ta’pa dio kidena to Filistin iato, anna tarru’ tama kidena, anna songka tipessussuk rokko padang.

Susimo kanataloanna Daud tu to Filistin iato umpake lobang sia batu, sia tang napopengkaa tu to Filistin sia napatei apa tae’ pa’dang lan limanna Daud.

Mangkato ma’dondomi tu Daud urreke’i lako, anna bendan dio sa’dena to Filistin iato, natoemi tu pa’dangna, nanonokki, napakatiti’i nata’takki tu ulunna. Iatonna tiromi to Filistin tu diona pa’baraninna matemo, mallai nasangmi.

Ta’pa ke’de’ nasangmi tu mintu’ to Israel sia to Yehuda, anna unnarrak-arrak unnula’ to Filistin lu lako Gat sia babangan Ekron. Na iatu mintu’ to Filistin dimangsanni siapanan dio lu lalan lu lako Saaraim sae lako Gat sia Ekron.

Mangkato tibalikmi tu to Israel unnula’ manuk-manukki tu to Filistin, anna pangrampai tu to’ tenda surodadunna.

Naalami Daud tu ulunna to Filistin iato, nabaai lako Yerusalem, apa iatu mintu’ pa’bunona napalan tendana.

Tonna tiromi Saul tu Daud ma’palulako to Filistin iato, ma’kadami tu datu lako Abner, pa’baraninna, nakua: E! Abner, mindara anak te pia muane iate? Mebalimi Abner: O puang, kumatemora ke la kutandai.

Nakuami datu: Maleko umpekutananni, mindara anak te pia muane.

Iatonna sulemo Daud umpatei tu to Filistin iato, nasolammi Abner mennolo lako Saul, na iatu ulu to Filistin iato, lan bangsiapa limanna.

Ma’kadami Saul lako, nakua: Mindaroko anak, e anakku? Mebalimi Daud nakua: Anaknana’ orangmi Isai, to Betlehem.